አደገኛው የአግላይ አመክንዮ፡ ለዲያቆን ዳንኤል ክብረት ንግግር የተሰጠ ምላሽ

በጉዱ ካሳ ለመሠረት ሚድያ

(መሠረት ሚድያ)- ዲያቆን ዳንኤል ክብረት በቅርቡ ኢትዮጵያውያን ዲያስፖራዎችን በተመለከተ ባደረገው ንግግር በአገር አንድነት፣ በክብር እና በመሠረታዊ ሰብአዊነት የሚያምን ሰብዓዊ ፍጡርን ሁሉ ሊያስደነግጥ የሚገባ አስተያየት ሰጥቷል።

እርግጥ ነው ግለሰቡ ግጭት ቀስቃሽ ንግግሮችን በመናገር ይታወቃል፣ እንደ ዳንኤል ንግግር ኢትዮጵያውያንን “የሀገሪቷ እውነተኛ ባለቤቶች” እና “በኢትዮጵያ ጉዳይ ምንም አስተያየት መስጠት የሌለባቸው” በሚል የሚከፈሉ ናቸው።

በውጪ የሚኖሩ ኢትዮጵያውያን በአገራቸው የመቀበር መብት እንኳን ሊያገኙ እንደማይገባ በንግግሩ አስታውቋል።

“በውጭ የሚኖሩ ሰዎች ከኢትዮጵያ ምንም መጠየቅ የለባቸውም። መጨረሻ ሲሞቱ ለምን ቅበሩን ይላሉ? ማን ባስጠበቀው ሀገር ነው ማን መጥቶ የሚቀበረው?" ሲል ንዴት በተናነቀው ድምፀት ይናገራል።

ንግግሩን ሲቀጥልም "ሀገር ዝመት ብትባል እኮ በውጭ ያለው አይዘምትም። እኔና እናንተ ነን የምንዘምተው። መርካቶ ቢወደድና ቢረክስ እኔና እናንተ ነን የምንጎዳው። የእኛን ችግር ላለመካፈል እነሱ ሄደዋል። So ይተዉልና ኢትዮጵያን። አያገባቸውም። ይተዉን። ግን በለንደን፣ በአምስተርዳም፣ በዋሺንግተን፣ በፌርፋክስ... ሲኖሩ ከርመው ቅበሩን ብለው ይመጣሉ። እዚያው በተከራዩት ሀገር ነው መቀበር ያለባቸው። ማን በጠበቀው ሀገር ማን ይቀበራል?" ሲል ይጠይቃል።

ይህ ንግግር ተራ ንግግር ብቻ ተደርጎ ሊወሰድ አይገባም፣ ንግግሩ በመሰረቱ አደገኛ ነው።

በቅርቡ በትግራይ ክልል በተካሄደው ጦርነት ይህ ሰው የመንግስት ተቃዋሚዎች ናቸው ባላቸው ላይ አመፅ ቀስቃሽ ንግግሮችን ደጋግሞ ተናግሯል። የተቃዋሚ ቡድኖች እና የተወሰኑ የሀገሪቷ የብሄሮች ከመንግስት ጋር ቅራኔ ውስጥ ስለገቡ ብቻ ዜጎች ሳይሆኑ የሀገሪቷ ጠላቶች ተደርገው እንዲታዩ ከፍተኛ ቅስቀሳ ሲያደርግ የነበረ ነው። ሲጠቀማቸው የነበሩት ቋንቋዎች የፖለቲካ ልዩነቶችን የህልውና ስጋት እንደሆኑ አድርጎ በመቅረፅ አጠቃላይ ብሄሩ በጥርጣሬ ወይንም በጥላቻ እንዲታይ ሲያደርግ የነበሩ ናቸው።

በጦርነት ጊዜ የህዝብ ወኪሎች እና አማካሪዎች ውጥረቶችን ከማባባስ ይልቅ የማረጋጋት የሞራል ኃላፊነት አለባቸው።

የዳንኤል ንግግሮች የአፍ ወለምታ ሳይሆኑ ታስቦባቸው የሚደረጉ የበለጠ ግጭት እና ብጥብጥ የሚፈጥሩ፣ እሳት ላይ ቤንዚን የሚያርከፈክፉ ናቸው።

ኢትዮጵያ የማንም የፖለቲካ አንጃ፣ የሀይማኖት አባት ወይም የመንግስት ባለስልጣን የግል ንብረት አይደለችም። በአዲስ አበባ፣ በዋሽንግተን፣ በአምስተርዳም፣ በለንደን ወይም በሌሎች ቦታዎች የሚኖሩ ኢትዮጵያውያን የሁሉም የሆነች ነች።

የኢትዮጵያ ዲያስፖራ የማይነጣጠል የሀገሪቱ ማህበራዊ፣ ኢኮኖሚያዊ እና ባህላዊ መዋቅር አካል ነው። በውጭ የሚገኙ በሚሊዮን የሚቆጠሩ ኢትዮጵያውያን በየአመቱ በቢሊዮን የሚቆጠር ዶላር ወደ ሀገር ቤት በመላክ ቤተሰብን በመደገፍ እና ብሄራዊ ኢኮኖሚን በማጠናከር የበኩላቸውን ሚና ይጫወታሉ። በዓለም አቀፍ ደረጃ ለኢትዮጵያ ይሟገታሉ፣ በንግድ ላይ በመሰማራት መዋለ ነዋያቸውን ያፈሳሉ። ከትውልድ አገራቸው ጋር ጥልቅ ስሜታዊ ትስስር አላቸው።

ዲያስፖራ ኢትዮጵያውያን አገራቸውን ትተዋል የሚል ቅጥፈት መናገር ዲያቆን ነኝ ከሚል የሚጠበቅ አይደለም። ቅድመ አያቶቻቸው ለዘመናት በኖሩበት አፈር ውስጥ የመቀበር መብታቸውን ለመግፈፍ መፈለጉ ደሞ ንግግሩን የበለጠ አሳሳቢ ያደርገዋል።

በውጭ አገር የሚኖሩ ብዙ ኢትዮጵያውያን “የአገሪቱን ችግሮች ከመጋራት” ለመሸሽ አልሄዱም።

ብዙዎቹ በፖለቲካ ጭቆና፣ በኢኮኖሚ ችግር፣ በጦርነት ወይም በእድል እጦት ምክንያት የተሰደዱ ናቸው። ሌሎች ደግሞ ለትምህርት፣ ለሥራ ወይም ለራሳቸው ደህንነት ሲሉ ሄዱ፣ ነገር ግን ቤተሰቦቻቸውን እና ማህበረሰባቸውን መደገፋቸውን ቀጥለዋል። 

ታዲያ ለምንድን ነው ዲያቆን ዳንኤል ከትውልድ አገራቸው ለመነጠል የፈለገው?

የኢትዮጵያ የወደፊት ዕጣ ፈንታ የሚወሰነው በአገር ውስጥም ሆነ በውጭ አገር ዜጎች መካከል ያለውን ትስስር በማጠናከር ላይ እንጂ ዜጎችን በመነጣጠል እና በመከፋፈል አይደለም።

የዳያስፖራ ማህበረሰቦች በታሪክ ውስጥ በአገር ልማት፣ በሰብአዊ ድጋፍ እና በፖለቲካ ማሻሻያ ውስጥ ወሳኝ ሚና ተጫውተዋል፣ እነሱን ማግለል አገሪቱን ከማጠናከር ይልቅ ያዳክማል።

***መሠረት ሚድያ ላይ የሚቀርቡ አስተያየቶች በሙሉ የፀሀፊዎቹ እንጂ የሚድያው አቋም እንዳልሆኑ ልናስታውስ እንወዳለን።

-መሠረት ሚድያ-