(መሠረት ሚድያ)- በቅርብ ጊዜያት በስፋት እየተከታተልናቸው ባሉ የ’Mixed Martial Arts’ (MMA) ስፖርት ውድድሮች ዙሪያ ብዙዎች ችላ ያሉት ነገር ግን አሳሳቢ የሆነ አንድ ትልቅ እውነታ አለ።
እሱም ከኦክታጎን (ከውድድር ሪንግ) ውጭ የሚደረጉ የቃላትና የአካል ግጭቶችን እንደ ትልቅ ስልት፣ ማስታወቂያ እና ፋሽን ቆጥሮ በማህበራዊ ሚዲያዎች እና በጋዜጣዊ መግለጫዎች (press conferences) ላይ በድብድብ ማስተዋወቅ የተለመደ ክስተት መሆኑ ነው።
ኤምኤምኤ (MMA) በስፖርታዊ ጨዋነት፣ በከፍተኛ ራስን የመግዛት ብቃት (self-discipline) እና ለተፎካካሪ ክብር በመስጠት ላይ የተገነባ ጥበብ ነው። ስፖርተኞች ለስፖርቱ ማስተዋወቂያ ሲሉ በሚያደርጓቸው እነዚህ ውጫዊ ግጭቶች የስፖርቱን ትክክለኛ እሴት እና ዲሲፕሊን እያደበዘዙት ይገኛሉ።
ከሁሉም በላይ ግን አሳሳቢው ነገር ይህ ድርጊት በሚቀጥለው ትውልድ ላይ የሚያሳድረው አሉታዊ ተፅዕኖ ነው። እነዚህን ስፖርተኞች እንደ ምሳሌ (role models) አድርገው ለሚመለከቱ ህፃናት እና ወጣቶች የምናስተላልፈው መልዕክት ምንድነው?
“በድርድር እና በስፖርታዊ ጨዋነት መፍታት የሚቻለን ነገር በኃይል እና በዓመፅ መፍታት ትክክለኛ መንገድ ነው” የሚል የተሳሳተ ግንዛቤ እያስጨበጥናቸው አይደለምን?
ይህ ዓይነቱ ባህሪ በስፖርቱ አለም ብቻ ሳይሆን እንደ ማህበረሰብም ዓመፅን የማስዋብ እና የማስለመድ (normalizing violence) አደገኛ የሞራል ውዝግብ ውስጥ መግባታችንን ያሳያል።
ስለሆነም አዘጋጆች፣ የስፖርት አመራሮች እና አትሌቶች ለንግድ ትርፍ ሲሉ የስፖርቱን ስነ-ምግባር እና የማህበረሰቡን ደህንነት ዋጋ ከማስከፈል ሊቆጠቡ ይገባል።
***መሠረት ሚድያ ላይ የሚቀርቡ አስተያየቶች በሙሉ የፀሀፊዎቹ እንጂ የሚድያው አቋም እንዳልሆኑ ልናስታውስ እንወዳለን።
| መሠረት ሚድያ |