የአቢሲንያ ባንክ ደንበኞች ወደ ሌሎች ባንኮች የሚልኩት ገንዘብ ከአካውንታቸው ተቀናሽ ቢሆንም ገንዘቡ ለተቀባይ እየደረሰ አለመሆኑን ተናገሩ

(መሠረት ሚድያ)- በቅርብ ቀናት በርከት ያሉ የአቢሲንያ ባንክ ደንበኞች ቅሬታቸውን ለመሠረት ሚድያ በፅሁፍ ሲያቀርቡ ቆይተዋል፣ ይህም ከባንኩ አካውንት ወደ ሌላ ባንኮች ከሚላክ ገንዘብ ጋር የተገናኘ ነው።

የባንኩ ደንበኞች እንደሚሉት ባንኩ ምንም አይነት መረጃ ለደንበኞቹ ሳይሰጥ ወደ ሌሎች ባንኮች የሚልኩት ገንዘብ ከአካውንታቸው ተቀናሽ ቢሆንም ገንዘቡ ለተቀባይ እየደረሰ አለመሆኑን ተናገረዋል።

ከህዳር 22/2018 ዓ.ም ጀምሮ የተከሰተው ይህ ችግር በርካቶችን ገንዘባቸው ተይዞባቸው እንዲቆይ እንደዳረጋቸው፣ በዚህም ስራ መስራት እና ገንዘብ መክፈል እንዳልቻሉ ይጠቅሳሉ።

"የባንኩ 'transfer to other banks' አገልግሎት በመያዙ ለከፋ ችግር ተዳርገናል" የሚሉት የባንኩ ተጠቃሚዎች በባንኩ የፌስቡክ ገፅ ጭምር አስተየየት መስጫ ላይ ችግራቸውን ቢፅፉም ምላሽ ማግኘት እንዳልቻሉ ያስረዳሉ።

"የዲጂታል ቡድኑ ወይም የባንኩ አመራሮች የተከሰተውን ችግር አሳውቀው እና ይቅርታ ጠይቀው ማስተካከል ሲኖርባቸው ዝም ብለዋል፣ ይህም ችግሩን አቃሎ ማየት እና ደንበኞችን አለማረዳት ነው የሚል ግምት እንድንወስድ አድርጎናል" በማለት አንድ ስሜ አይጠቀስ ያሉ ደንበኛ ተናግረዋል።

"የህዝብን ገንዘብ ለበርካታ ቀናት አግቶ ይዞ መቆየት ምን ማለት ነው? ለምን ግልፅ መረጃ አይሰጡም? ብዙ ሰው ንግድ ተበላሽቶበታል፣ የትምህርት ቤት ክፍያ እንኳን መክፈል ያልቻሉ አሉ" የሚሉት ሌላኛዋ የባንክ ደንበኛ ናቸው።

መሠረት ሚድያ በዚህ ዙርያ አቢሲንያ ባንክን መረጃ ጠይቋል።

ከሰሞኑ ወደ ሌሎች ባንኮች የሚደረጉ የገንዘብ ችግሮች መከሰታቸውን በማረጋገጥ የጀመረው የባንኩ ምላሽ ችግሩ በግዜያዊ የቴክኒክ መቆራረጥ መሆኑን ይጠቅሳል።

"ችግሩ የተፈጠረው በባንኩ 'external interbank settlement ecosystem' ውስጥ ነው። እንደተባለው ከላኪዎች ላይ ገንዘብ ቢቆርጥም የማረጋገጫ እና ክፍያ የመፈፀም ሂደቱ መዘግየት አጋጥሞታል። በዚህ አጋጣሚ ችግሩ የደህንነት መጣስ አለመሆኑን ለመግለፅ እንወዳለን፣ ከደንበኞቻችን ገንዘብ ውስጥም የጠፋ የለም" ብሏል።

ባንኩ ምን ያህል ደንበኞች በዚህ ችግር እንደተጠቁ ከመግለፅ የተቆጠበ ሲሆን አሁን ላይ እያንዳንዱን መዘግየት ያጋጠመውን የገንዘብ ትራንስፈር የማረጋገጥ ስራ እየተሰራ ነው ብሏል።

"ለደንበኞች መረጃ ባለመስጠት ዙርያ ያለውን ሁኔታ እንረዳለን። ባንኩ መረጃ ከመስጠቱ በፊት የቴክኒክ ዳሰሳ በማድረግ ትክክለኛ መረጃ ለመስጠት ከማሰብ የመነጨ ነው" በማለት አሁን ላይ ኦፊሴላዊ መግለጫ እየተዘጋጀ መሆኑን አንስቷል።

በመጨረሻም ደምበኞች 'በአጭር ግዜ' ገንዘባቸው እንደሚስተካከል ገልፆ ለተፈጠረው ሁኔታ መፀፀቱን ገልጿል።

-መሠረት ሚድያ-